Tuesday, January 19, 2016

സില്‍മാനിരൂപണം












     പാലക്കാട്ടെ പ്രമുഖ തിയ്യറ്റര്‍ പരിസരത്ത്  ലോട്ടറി ടിക്കറ്റ്  വിറ്റുനടക്കുകയായിരുന്നു അംബരീഷ്. സിനിമാകൊട്ടകയിലെ തിരക്കാണ്  അയാളുടെ അന്നം . ലോട്ടറി വില്‍ക്കാം( ചെറിയ തോതില്‍ കരിഞ്ചന്തയില്‍ സിനിമാ ടിക്കറ്റ്  വില്‍ക്കുകയും  ചെയ്യാം) . മലയാള സിനിമയിലെ നിര്‍മാതാക്കളും സംവിധായകരും തിരക്കഥാകൃത്തുക്കളും കൊണ്ടുപിടിച്ച്  തിരക്കുള്ള പടങ്ങള്‍ എടുക്കട്ടേയെന്ന്‍  അയാള്‍ നിത്യേന പ്രാര്‍ത്ഥിക്കുന്നു .
     അങ്ങനെയിരിക്കെ ' പ്രേമം ' പുറത്തിറങ്ങി . നീണ്ട താടിയും കറുത്ത ഷര്‍ട്ടുമിട്ട ചെക്കന്മാരുടെ തള്ളികയറ്റം. ടിക്കറ്റു കിട്ടാതെ നിരാശരായി പോകുന്ന കമിതാക്കള്‍.
" എട്ടേ ടിക്കറ്റുണ്ടോ ? " ഒരു പയ്യന്‍ പ്രതീക്ഷ കൈവിടാതെ ചോദിക്കുന്നു.അവനറിയാം കരിഞ്ചന്തയില്‍ ടിക്കറ്റു വില്‍ക്കുന്നവന്റെ പ്രകൃതം . അംബരീഷ്  പുഞ്ചിരിച്ചു .
" ഒന്നു ബാക്കിയുണ്ട് " അംബരീഷ് കൊളുത്തിട്ടു .
"ഒന്നു പോര " നിരാശയോടെ പയ്യന്‍ കുറച്ചപ്പുറത്ത്‌  മാറിനില്‍ക്കുന്ന പെണ്‍കുട്ടിയെ നോക്കി.
"ത്തിരി കൂടും " മാന്ത്രികന്റെ വിരുതോടെ അംബരീഷ്  പറഞ്ഞു .
"ഓ...റെഡി  "
നിമിഷനേരം കൊണ്ട് കച്ചവടം നടന്നു.അംബരീഷിനെ നന്ദിയോടെ വണങ്ങി അവരിരുവരും തിയ്യറ്ററിനകത്തേക്കു കുതിച്ചു.
     ഇതു കൊള്ളാമല്ലോ .അംബരീഷിലെ 'സില്‍മാനിരൂപകന്‍' ഉണര്‍ന്നു. ആളുകളെ കയറ്റാനുള്ള രസതന്ത്രം മനസ്സിലാക്കാന്‍ പടം കാണാന്‍ തീരുമാനിച്ചു . പലവട്ടം ടിക്കറ്റെടുത്തു . അപ്പോഴൊക്കെ അത്യാവശ്യക്കാര്‍ വട്ടം കൂടി . പണത്തിന്റെ കിലുക്കം , പ്രലോഭനം . പടം നാളേയും കാണാം . കച്ചവടം നടക്കട്ടെ . അങ്ങനെയങ്ങനെ അംബരീഷിലെ 'സില്‍മാനിരൂപകന് ' വാട്ടം സംഭവിച്ച ഒരു ഉച്ച നേരത്താണ്  സിനിമ കണ്ടത് .നിരൂപണം പകര്‍ത്തി വെക്കാനുള്ള പ്രതിഭ അപ്പോഴേക്കും കൈമോശം വന്നിരുന്നു.
    മലയാള സിനിമയിലെ നിര്‍മാതാക്കളെയും  സംവിധായകന്മാരെയും  തിരക്കഥാകൃത്തുക്കളെയും സഹായിക്കാനുള്ള ഒരു എളിയ പരിശ്രമം അങ്ങനെ രേഖപ്പെടുത്താതെ പോയി.

1 comment:

  1. സിനിമാലോകത്തിന്റെ നഷ്ടം!!!!!!!!!!!

    ReplyDelete