Friday, December 26, 2014

കീമോ



കീമോ

ചിന്തയില്‍,ഉറക്കത്തില്‍ ,
ബോധക്ഷയത്തില്‍ .

വളരുന്നുണ്ടുരുക്കിനെ
പിളര്‍ക്കുന്ന നഖങ്ങള്‍ ,
രാകി മിനുക്കിയ തേറ്റകള്‍,
ചോരയുടെ  വാട ,
ശ്വാസത്തിന്‍ കനം.

മലിനമായതൊക്കെ
പുറത്തേക്കു തികട്ടവേ,
ഒഴിഞ്ഞതേയില്ലെന്‍ ഞരമ്പുകളില്‍
ഇരമ്പിയാര്‍ക്കുന്ന കടന്നല്‍കൂട്ടം .

ഒരു കിളിയൊച്ചപോലെ
പിണങ്ങിപ്പോകെ;
പല കിളിയൊച്ചകളായി
തിരിച്ചുവരരുതേ.








Thursday, December 18, 2014

പെഷ് വാര്‍



ഇനി അടയാളപ്പെടുത്തുക വയ്യ;
കണ്ണിരും രക്തവും ഒരുപോലെ
തണുത്തുറയുന്ന ശൈത്യം.

കാരുണ്യവാനായ നാഥാ , എന്നോടു പൊറുക്കണേ
ജീവനോടെയിരിക്കുവാന്‍
മരിച്ചതായഭിനയിക്കുന്നു, ഞാന്‍.

കൊല്ലപ്പെട്ടവന്റെ നെഞ്ച്
ഒതുങ്ങിയതോ ? വികസിച്ചതോ ?
കൊല്ലപ്പെട്ടവന്റെ കവിള്‍ത്തടം
തളര്‍ന്നതോ ? വിളറിയതോ ?

മരുഭൂവിന്റെ കാര്‍ക്കശ്യത്തില്‍
ജലധാരാ സൃഷ്ടിച്ച കാരുണ്യമേ,
ഇപ്പോഴെന്‍ ചുണ്ടുകള്‍
ദാഹത്താല്‍ പിളരരുതേ,
ഭയത്താല്‍ വിറക്കരുതേ .

കൊന്നുതള്ളിയ കുട്ടികളെ
അവര്‍,നായിന്റെ മക്കള്‍
തോക്കിന്‍ പാത്തികള്‍കൊണ്ടിളക്കി നോക്കുന്നു.

വേദന, കാല്‍മുട്ടുതുളച്ചു കയറുന്ന കൊടിയ  വേദന
നാഥാ, ബോധക്ഷയത്താല്‍ അനുഗ്രഹിക്കണേ ,
കൊല്ലപ്പെട്ടവന്റെ തുടയില്‍നിന്നും
രക്തം നിലക്കാതെയൊഴുകുമോ ?

ഒരു നിമിഷനേരമാ ശവംതീനികള്‍ക്ക്
ജീവനോടെ ബാക്കിയായ കുരുന്നുകളെ
കാണാതിരിക്കട്ടെ.

താടിമുളച്ചിട്ടും ആണത്തമില്ലാത്തവര്‍ ,
ഒരു കുഞ്ഞിന്നിളം ചിരിപോലും
മൊത്തിക്കുടിക്കാത്തോര്‍,
പ്രണയപൂര്‍വ്വമടുത്തുചെന്നൊരു-
പെണ്ണിന്റെ കണ്ണിന്നഴകു കാണാത്തോര്‍ ,
ആണല്ലെന്നകാര്യം പരസ്പരം തപ്പിനോക്കി
ഉള്‍പ്പക മുഴുത്തോര്‍, പൊലയാടികള്‍ .

ആര്‍ക്കൊക്കെ പുറത്തു പോകണം ?
ഞങ്ങളെല്ലാവരും കൈപൊക്കി.
കുറച്ചുപേരെ ചുമരിനോട്  ചേര്‍ത്തു നിര്‍ത്തി.
വിടരാന്‍ തുടങ്ങിയ മൊട്ടുകള്‍ ചിതറിത്തെറിച്ചു .
അവര്‍ പുറത്തു പോയതു കണ്ടില്ലേ ?
പൊക്കിള്‍ക്കൊടിയില്ലാത്ത ആണ്‍ കോലങ്ങള്‍ ചിരിച്ചു.

ഇനി ആര്‍ക്കൊക്കെ പുറത്തു പോകണം ?
ഞങ്ങളാരും  കൈപൊക്കിയില്ല
വിചിത്രമായ ഭയം നടമാടി.
അവര്‍ തുരുതുരെ വെടിവെച്ചു
എന്റെ കാല്‍മുട്ടുകള്‍ ചിതറി.

കാരുണ്യവാനായ നാഥാ , എന്നോടു പൊറുക്കണേ
ജീവനോടെയിരിക്കുവാന്‍
മരിച്ചതായഭിനയിക്കുന്നു, ഞാന്‍.

പ്രപഞ്ചങ്ങളുടെ സൃഷ്ടാവേ ,
അതിലോലമായ ഒരു മായകൊണ്ട്
ഇതൊക്കെയും പുതുക്കണേ
നാളെ പകല്‍ ഞങ്ങള്‍ക്കു
വീണ്ടുമിവിടെ പാറിനടക്കണം.
-----------------------------------------------------------------------------------------------------------------
പെഷ് വാര്‍  സൈനിക് സ്കൂളിലെ   കുട്ടികളില്‍ പലരും മരിച്ചതായഭിനയിച്ച്  താലിബാന്‍ ഭീകരരില്‍ നിന്ന് രക്ഷപ്പെട്ടു. -പത്രവാര്‍ത്ത .









Monday, December 15, 2014

കുഴിമന്തി













വിമാനത്താവളത്തിന്റെ
പരിസരത്താണാദ്യം  കണ്ടത് .
വരാന്‍ വൈകിയതിന്റെ കാരണം
പറയാതെ പറഞ്ഞ്.

രുചിമുകുളങ്ങളിലപ്പോഴേക്കും
ഒട്ടിപ്പോയിരുന്നോ,പിസ്സ
ഹോട്ട് ഡോഗ് , കെ.എഫ് .സി, ബര്‍ഗര്‍ .

നാവിലൂടൂര്‍ന്നിറങ്ങി , പ്പരുവമായ്
പുതുരുചിക,ളന്യന്റെ
തീന്‍മേശാവിഭവങ്ങള്‍.

രുചികള്‍
കാലദേശത്തിന്നടയാളങ്ങള്‍,
കൈപുണ്യമായ്  പകര്‍ന്ന നന്മകളെന്ന
ചൊല്ലൊക്കെ കാലന്‍ കൊണ്ടുപോകയാല്‍  


മടക്കവിമാനത്തില്‍ കയറി
ഏതെങ്കിലു,മന്യദേശങ്ങളില്‍
വിരുന്നൂട്ടുന്നുണ്ടാകുമോ
തോരന്‍, അവിയല്‍
കാളന്‍, കൂട്ടുകറി ?

Thursday, December 4, 2014

നഗരം












നഗരം പുതിയ ആശുപത്രികളെ തന്നു.

പുതിയ നടപ്പാതകള്‍ ,
പാര്‍ക്കുകള്‍ ,മാളുകള്‍
തീന്‍പണ്ടങ്ങള്‍, കറങ്ങുന്ന ഗോവണികള്‍

ഞങ്ങള്‍ പുതിയ രോഗങ്ങളുമായി
ആശുപത്രികളെ വരവേറ്റു .

നഗരം പുതിയ ജോലികള്‍ തന്നു .

പൊന്നുഅപ്പ ലിഫ്റ്റ്‌ ഓപ്പറേറ്ററായി ,
ചെറുത്‌  തോട്ടം നനച്ചു
ഭാമേടത്തി മൂത്രപ്പുര കഴുകുന്നു
ചന്ദ്രു ബസ്സുകള്‍ക്ക് കീലിടുന്നു
തമ്പാന്‍ ഗുണ്ടാപ്പിരിവ് , രാജന്‍ വേസ്റ്റ് കോരി
മുരുകന്‍ രാത്രി കാവല്‍ക്കാരന്‍
ലത/തല  എന്നിങ്ങനെ.

നഗരത്തില്‍ ഉണ്ടെന്നു പറയുന്ന
പുതിയ ജോലികള്‍ തിരഞ്ഞ്‌
ജനറല്‍ കമ്പാര്‍ട്ട്മെന്റുകളില്‍
തിങ്ങിഞെരുങ്ങി
കൂറകള്‍, എലികള്‍, പാറ്റകള്‍
ചത്ത കോഴിയിറച്ചികള്‍ ,
ഗുഹ്യരോഗങ്ങള്‍ ,TNT തുടങ്ങിയവ
വന്നിറങ്ങി.


ശരീരമാണോ പഴന്തുണിയാണോ
എന്നുറപ്പില്ലാത്ത ചില അതിരുകള്‍
നഗരത്തിന്റെ വലിപ്പം കൂട്ടാന്‍
അകലങ്ങളിലേക്ക്  നടന്നു തുടങ്ങി .