Wednesday, August 27, 2014

കടല്‍പ്പാലം













പ്രണയമേ
നീയെന്നെ കൈ വെടിയരുതേ
വിറയ്ക്കുന്നുന്ടെന്‍ വിരലുകളെങ്കിലും

അന്നു നിന്‍റെയാദ്യ  -
ചുംബനത്താല്‍
വിറച്ചിരുന്നെന്റെ നെഞ്ചകമാകെ.

നമ്മളന്ന്
കടല്‍പ്പാലത്തിലൂടെ
നടന്നു തിരകളെ തൊട്ടതും,
തിരകള്‍
നിന്‍റെ ചുണ്ടിലോതിയ
ഉപ്പും മധുരവും
പകര്‍ന്നെടുത്തെന്‍
ജീവന്റെയുടയാട പണിതതും,
ഏല്ലുകോച്ചുന്ന തണുപ്പിനെ
പുണരാതെ
ഹൃദയതാളം ഒപ്പത്തിലാക്കുവാന്‍
നെഞ്ചു ചേര്‍ത്തു വച്ചില്ലേ
പുതിയ ധമനികളിലൂടെ
പ്രണയമൊഴുകുവാന്‍  

ഒന്നു കണ്ണടച്ചാല്‍
വീണ്ടുമവിടെയെത്താം
ദ്രവിച്ചിട്ടുണ്ടാകുമാ കടല്‍പ്പാലമെങ്കിലും.

പ്രണയമേ
നീയെന്റെ കൈകള്‍ പിടിക്കണം
ഓര്‍മയുടെ കമ്പളം വിരിച്ചെന്റെ
തണുപ്പിനെയകറ്റുവാന്‍.