Sunday, December 3, 2017

രണ്ടാമത്തെ ഗാന്ധി

രണ്ടാമതൊരു
ഗാന്ധിയുണ്ട്

ഗോഡ് സെ യുടെ
വെടിയൊച്ചയ്ക്ക്
ശേഷം പിറന്നത്

രണ്ടാമത്തെ ഗാന്ധി
ആയിരം കനൽവഴികളിൽ
സ്വപ്നസഞ്ചാരം നടത്തി
ഒരോ പുലരിയിലും
പിറക്കുന്നു.

വിശപ്പകറ്റാൻ
മാംസം വേവിച്ചതിന്
രണ്ടാമത്തെ ഗാന്ധിയെ
കൊന്നു മണ്ണിൽ പൂഴ്ത്തുന്നു

കാലികളെ ചന്തയിലേക്ക്
കൊണ്ടുപോകും വഴി
വരണ്ട ഭൂമിയിലെ
ഒറ്റമരത്തിൽ
തൂക്കിലേറ്റുന്നു.

എഴുതുവാനിരിക്കുന്ന
ഗാന്ധിയുടെ
തലപിളർന്ന്
വാക്കിന്നുറവയെ
ചവിട്ടിയരയ്ക്കുന്നു

രണ്ടാമത്തെ ഗാന്ധി
വരാനിരിക്കുന്ന
ക്ഷേമകാലത്തെ
പട്ടിണിഗാന്ധിയോട്
നെഞ്ചു ചേർക്കുന്നു.

പുഴുവരിച്ച്
ആശുപത്രിവരാന്തയിൽ
കിടക്കുന്ന വേശ്യയ്ക്ക്
കുട്ടിരിക്കുന്നു.

വോട്ടുചെയ്യാനായ്
വരിനില്ക്കുമ്പോൾ
പാക്കിസ്ഥാൻ ചാരനെന്ന് പറഞ്ഞ്
കല്ലെറിഞ്ഞു പായിക്കുന്നു.

രണ്ടാം ഗാന്ധി
ആദിവാസിയാണ്
ഭൂമിയിൽ നിന്നും
ഭാഷയിൽ നിന്നും
സ്വപ്നങ്ങളിൽ നിന്നും
കുടിയൊഴിക്കപ്പെട്ടവനാണ്.

തീവണ്ടിയിലെ
ഒരു സെക്കന്റ്ക്ലാസ്
യാത്രയ്ക്കിടെ
ബോഗിയോടെ
തീക്കൊളുത്തുന്നു;
രണ്ടാമത്തെ ഗാന്ധിയെ

തീയ്യായ്; പാതിവെന്ത ശരീരമായ്
ഗോതമ്പുപാടങ്ങളിലേക്ക്
പാഞ്ഞ ഗാന്ധിയെ
വെള്ളമൊഴിച്ച് കെടുത്തുന്നു.

രണ്ടാമത്തെഗാന്ധി
ചാരമാണ്.

ചാരത്തിൽ നിന്നും
ഒരു പുൽക്കൊടിയും
മുളയ്ക്കാതിരിക്കാൻ
ആളുകൾ ഊഴംവെച്ച്
കാത്തിരിക്കുന്നു.

ഇനിയൊരബദ്ധം വയ്യ
വീണ്ടുമൊരു
വെടിയൊച്ച വേണ്ട
നാശം?!മുളയ്ക്കാതിരിക്കട്ടെ!!
             

ചിത്രം :GGVHSS നെന്മാറയിലെ നോട്ടീസ് ബോര്‍ഡില്‍ നിന്നും